Anmelden

Einloggen

Username *
Password *
an mich erinnern

Léif Klenggäertner alleguer,
Ech si frou, Iech fir d’éischt eemol zwou gutt Noriichte kënne matzedeelen.
De groussherzoglechen Haff huet ons matgedeelt, datt nom Dout vun eisem veréierte
Grand-Duc Jean, dee vun 1939 un héije Protecteur vun der Ligue Gaart an Heem war, de
Grand-Duc an d’Grande-Duchesse den Héije Patronnage iwwerhuelen, wouriwwer mir als
Ligue vun de Lëtzebuerger Klenggäertner houfreg sinn.
Da si mir och frou datt Lëtzebuerg als éischt Land an Europa, a ganz am Sënn vun onsem bal
schonn traditionellen Engagement géint Pestiziden, d’Decisioun geholl huet, de Glyphosat,
besser bekannt als Round Up, an onsem Land ze verbidden.
Ech wëll awer och eng méi traureg Noriicht mat Iech deelen, nämlech déi, datt onsem Éierepresident
Metty Loos seng Fra, an trei Matkämpferin Francine Loos-Mootz ons fir ëmmer
verlooss huet. Dat huet mir d’Geleeënheet ginn, de Metty Loos besser kennen ze léieren an en
Abléck ze kréien an d’Geschicht vun der Ligue, dee méi perséinlech net kënnt sinn. Hien huet
mer och en Abléck ginn a seng perséinlech Archiven, an als ale Geschichtsgeck wäert ech mech
an den nächste Méint méi déif do dra knéien.
Et huet mer besonnesch erlaabt, eng Versioun vun den éischte Statute vun der Ligue ze kréien,
déi vun der Fusioun vun de CTF Sektiounen mat deene vun den Amis de la Fleurs am Joer 1928, déi
weder op enger offizieller Plaz, nach an onsem Archiv vun der Ligue ze fanne waren.
Dës éischt Statute si wichteg, well mer momentan am gaang sinn, mat dem Notaire
Martine Schaeffer ons nei Statuten als asbl auszeschaffen. Mir wäerten Iech méi dozou um
Kongress am Mäerz ze zielen hunn, grad wéi zu onsem Projet „neit Heem“, wéinst deem
mer e Rendez-vous beim Schäfferot vun der Gemeng Lëtzebuerg hunn.
Mir wëllen Iech dann och moralesch op en ausseruerdentlechen Nationalkongress preparéieren,
wou mer dann déi Statutenännerung wëlle virhuelen, wahrscheinlech Ufank Hierscht, well
souvill Zäit brauche mer, fir d’Accorde vun den zoustännege Ministèren ze kréien.
Ech wëll vun der Geleeënheet profitéieren, e grousse Merci lasszeginn un déi Sektiounen, déi et
dëst Joer fäerdeg bruecht hunn, hir Statutenännerung duerchzezéien, ech zielen se net op, well
ech kënnt eng vergiessen. Ech wëll Iech awer erzielen, datt meng eege Sektioun Rollengergronn
dat virun enger Woch ouni Problem duerchgezunn huet, fir all déi ze encouragéieren déi et nach
viru sech hunn.
Mir mussen ons als Ligue ganz allgemeng drop astellen, datt mer an de nächste puer Joer nach
eng Rei Sektioune wäerte verléieren, well se keng Leit fanne fir an hir Comitéen, well se wéineg
Echoen hu vun hiren, oft zahlreiche Memberen, a well mir als Ligue ons an engem Ëmbroch
befannen.
Ech perséinlech gleewen drun, datt mer duerch Ëmstrukturéierung vun dem Sektiounsëmland,
eng nei juristesch Personnalitéit an dem Engagement vun all deene Leit, deenen ech ëmmer
erëm begéinen, an déi d’Traditioun vun de Klenggäertner bereet si weider ze féieren, mir ons
Membere kënne behalen, sief et a méi grousse, besser opgestallte Sektiounen, sief et do wou dat
net méiglech ass, an enger neier zentraler Sektioun, déi lokal net méi gebonne wäert sinn.
An dëser Ausgab ass dann och, last but not least, d’Invitatioun fir onse Kongress 2020, dee jo
hei bei mir an der Stad ass, an ech mengen, et gëtt e flotte Kongress, eleng scho wéinst der
Lokalitéit, dem Engagement vum Stater Schäfferot an der Previsioun, datt mer ons an d’Startlächer
setzen fir d’LUGA 2023, wou ons Klenggäertnerbewegung, wie soss wa net mir, eng
wichteg Roll sollt spillen.
An der Hoffnung, méiglechst vill Sektioune kënnen um Kongress ze begréissen, mat engem
grousse Merci un de Stater Schäfferot fir seng Ënnerstëtzung souwuel fir de Kongress wéi och
fir onse grousse Projet, wëllt ech awer och onse Memberen alleguer en erfollegräicht Joer an
eng schéi Saison 2020 wënschen.
Ech si mer bewosst, datt ech probéiert hunn, zimlech vill an dëse
Leitartikel ze packen, an ech hoffen, datt vill vun Iech d’Gedold
hunn, en och bis zum Enn ze liesen!
Et ass et derwäert, ons Ligue ass et derwäert!
Ons Iddien, Traditiounen an Zieler sinn et derwäert.
Bis geschwënn also,

Martine V2

Dr Martine Mergen
Presidentin vun der Ligue CTF

         
 
 
Zum Seitenanfang